حليم غضبان

ولسه أحلامي وردية
بتسري في دمي وعروقي
تزيد اللهفة من شوقي
أعيش بكرة على ذوقي
لا واجبي أنساه
ولا حقوقي
وأشوف شمسه مضوية
تهل ف ساعة صبحية
تنور لي خطى طريقي
وأعيش وياها ف البساتين
مع الياسمين
تكون مركب ف بحر أمين
وأنا القبطان
***
ويوم ورا يوم حنيني يزيد
ونار الشوق
ف قلبي تقيد
لفجر جديد
ينور سكتي وداري
يكون الضلة ف نهاري
وطول ليلي
يكون قنديل
يكون لي دليل
ولا آجي ف يوم أبات حيران
***
وحلمي وحلم أجدادي
وأولادي
يعيش ويايا بين يدي
ومين قدي
لو أقدر يوم أكون ملاح
أكون فلاح
تعيش الدنيا من كدي
ونفسي م السماح نابعة
تصير ف الضلمة نور شمعة
تنورها
وتبقى الوحشة بيا أمان
وللباطل أكون سجان
أكون عنتر أبو الفرسان
ف إيدي السيف
ولا أعرف خوف
يكون قلبي
حليم غضبان