الموضة وفن التقليد

الموضة في بلدي .. بساط وردي .. دايما ممدود
لا في يوم فكرنا .. في مين مده .. ولا يوم بنعود
والكل بيجري .. وراه دايما .. أحفاد وجدود
شاربين .. آكلين .. لابسين موضة .. وبقينا قرود
بنقلد روسيا .. وأمريكا .. إسبان .. ويهود
من غير تفكير .. دايما نجري .. ورا كل جديد
جاي لينا .. يبهدل في عاداتنا .. ويلغي التقاليد
لو شفنا في يوم .. الناس ماشية .. ع الراس والإيد
نصبح لابسين .. جزمة ف إيدنا .. أو حدوة حديد
وعقولنا .. ياعالم .. لغيناها .. وبقينا عبيد
للموضة .. الكل في محرابها .. ركع وسجود
خليك اسبور .. يا بني يامسعد .. وانت يا مسعود
لبسك اتيكيت .. مشيك اتيكيت .. على نغمة عود
وكلامك .. نصه بالافرنجي .. bon jour – very good
وانت ياعدلات .. وانت يافتكات .. يا ام عيون سود
في عينيك السحر .. وعلى جسمك غضب المعبود
اللبس اسبور .. جدا خالص .. فساتين a la mode
مدنية ايه .. ديه ياعالم .. دا جهل أكيد
دا سلاح .. بيحارب عقيدتنا .. واهو دا المقصود
لو نمشي وراه .. ها يوصلنا .. لطريق مسدود
نندم .. نتحسر في الآخر .. والندم ايه يفيد
ما عقولنا بجهلنا .. لغيناها .. ولبسنا القيد
وبقينا اساتذة .. دنيتنا .. في فن التقليد

مصر

واشوفك فوق جبين الشمس طالعة تصبحي
وأشوفك بين نجوم الليل تلالي وتمرحي
تتمرجحي
بين الجفون
جوا العيون ويا السهر
يا أم الخدود كما شق القمر
ياللي حنانك أغلى هدية من القدر
يا أم العيون السود بتحلم بالأمان
فاردة قلوعك
سابقة خطاويكي الزمان
ومين يقدر على مهرك
غير اللي الحب في قلبه
غناوي كلها باسمك
وطاير فوق دروب الشوق بمواله
وفيه رسمك
لو ان المهر يا حلوة كنوز الأرض
ترخصلك
دا انا عاشقك يا متعاجبة
ومستني في يوم أنسى
سنين الهجر والغربة
وأشوفك في السما نجمة
تضوي فوق جبين الشوق وتحلالي
وأحط الكلمة ع الكلمة في موالي
وأغنيلك
يا ساكنة القلب من يومك
يا وهبالي سمار نيلك